march-2022

దండాలు…దండాలు ఓ వక్రతుండా…
ఏమియ్య నీకు..మా కలలు పండ..
గౌరమ్మ ముద్దాడు బంగారుకొండ…
కావాలి మాకెపుడు నీ అండ దండ..

ఉజ్జయినీ పురమునకు వత్తుమయా కాళుడా…
మా పూజలందుకొను వరమును ఎప్పుడిత్తువయా కాళుడా…
భక్తిమీర సేవచేయ తరలి వచ్చి కాళుడా….

మహా కాళేశ్వరా…పరమేశ్వరా…
రౌద్ర రూప స్వరూపా…జగదీశ్వరా…
శిరమొంచి మొక్కేము నీ పాదాలను..

ఏమాయరా శంకరా…నీ మోములో చిరునగవులు….
కనమాయరా..ఎరుపెక్కిన కనులలో నీ కరుణ సంపదలు…
తట్టుకోగలదా శంకరా…ధరణి నీవాగ్రహిస్తే…

దర్శించుకోవాలని వుంది దయాగుణశీలా నా మనసుకి….
నిన్ను పూజించుకోవాలని ఉంది శంకరా..చేరి నీ గుడి లోనికి…
ఆనతియ్యరా చేయ నీ పూజా విధులను….

ఒకటా, రెండా నీకు ఎన్నైన పెడతాము దండాలు సామీ…
కాయా,పండా నీకు ఏదిష్టమో చెప్పరా…నైవేద్యమెడతాము బంగారు సామీ…

సుందరాకృతిన శంకరా..నిను గాంచినాక…
మదిన పుణ్య స్పందనలు ఉప్పొంగినాక…
పడనివాడెవ్వడు శంకరా…ఈ జగతిలో…

ఏపాటి జ్ఞానమున్నది నాకు..
నిను వర్ణింప నిత్య నీరాజనాల నిటలాక్షుడా…
కారణజన్ముడనై జన్మించవలె…

పరమేశ్వరా…ప్రతి క్షణము నీవు గురుతొస్తువుంటే…
మనసు నీ స్మరణమే పరమావధిగా ఎంచుకుంటుంటే…
పోనంది శంకరా…ఈ తనువు గుడి దాటి ఇంటికి….

పొరపాటున నిను మేము మరచుచున్నా….
ఏమరుపాటుగ కూడ మము నీవు మరువవయ్యా శంకరా…
మనుగడల పరుగాటలో నిను మేము తలచకున్నా…